意外呢兩個字真係可以黎得咁突然咁得人驚
七月時係我地係Nelson嘅時候
有一日我地同埋強哥嘅老友一齊帶埋兩個小朋友去行山
呢個行山都算中級版
個山好高有點斜
但沿路都算好行 只係斜左少少
小朋友黎講 幾歲大算唔易行
但就一定唔係危險
由於果日都熱 所以行上去嘅過程都辛苦
但都完成到
係山上飽覽完一望無際嘅風景之後 我地就行返落山
落山比較容易
大家慢慢行 都唔算太辛苦
係落山落到一大半嘅時候
突然之間有隻類似烏鴉嘅雀仔突然停左係棵樹上面
不停尖叫尖叫
好大聲
我地因爲佢所以停低左
覺得「咁奇怪嘅？點解隻雀仔不停大叫？」
係我地停低嘅四五秒
突然之間我地聽到好大聲
有野由山上「碌/撲」落黎我地度
果刻講緊嘅兩秒嘅事
有一大舊野係強哥同Igo之間碌過左
我企左係Igo後面 Yougo係我後面
強哥朋友係最前同Ruby一齊
果刻 我好大聲尖叫
我地無一個人黎得切反應
瞬間嘅兩秒 我同強哥果刻不約而同係諗起bear attack
我地聽到果下聲好大同衝向我地度
但當「果舊野」碌過左Igo同強哥
我地先知果舊係一舊超大嘅巨石
起碼有50磅
由山上碌落黎
事隔一個月多 我而家諗起果刻都全身起雞皮
因為只要佢碌過少少係強哥身上 就算無生命危險
都會無左對腳
而如果碌係Igo身上......
我諗一下 都全身發抖
我唔識形容果下突如其來 無人來得切反應嘅恐懼
強哥朋友住係果度30幾年
每星期都去行呢個山 從未遇過咁嘅意外
佢都呆左
好多野都係未殺埋身 都唔知果種感覺
而家每每攬住兩個小朋友同老公時
我都會攬得好實
好珍惜佢地身體健康平平安安同我一齊
如果你今日都有野諗唔通 有野好執著
希望你都可以懂得放低
因為當自己同身邊嘅親人都身體健康無事無幹時
仲有咩大事要令自己唔開心？
#我地諗返轉頭隻烏鴉其實係提緊我地有危險
#件事諗返都毛管豎 😢
Search